Jolas konpetitiboak jolas kooperatibo bihurturik

IZENA	ZAPI JOLASA (jolas konpetitiboa)
ITURRIA	http://harriorriar.blogspot.com.es
HELBURUAK	Arintasuna eta kontzentrazioa lantzea. Norberaren gaitasunaren eta nolakotasun fisikoaren garrantziaz ohartzea.
ADINA	4 urteko haurrak.
PARTAIDE KOPURUA	16 pertsona inguru
MATERIALA	Zapi bat.
DESKRIBAPENA	Jokalari guztiak, bat izan ezik, bi taldetan banatuko dira. Beste jokalari bat zapitxoa eusten geratuko da, "agintaria" izango dena. Korrika egiteko egokia den toki bat aukeratu eta talde bakoitza mutur batean jarriz, agintaria bi taldeen artean kokatuko da. Talde bakoitza erdira begira jarri eta talde bakoitzeko jokalarien artean zenbakiak banatuko dituzte, hau da, jokalari bakoitzari zenbaki bat egokituko zaio. Erdian dagoenak, zenbaki bat ozenki esango du, eta zenbaki horri dagokien kideak (talde bakoitzetik bana) ahalik eta azkarren joan beharko dira erdikoak eskuan duen zapiaren bila. Kontu handiz eta erdiko marra zapaldu edota pasatu gabe zapia hartzen saiatuko dira. Zapia hartzea lortzen duenak bere kideengana iristea izango du helburu. Lortuz gero, taldearentzat puntua eta zenbaki bereko aurkaria eliminatu egingo da. Aitzitik, zapia hartu ez duenak zapiduna harrapatzen saiatuko da. Harrapatuz gero, bere taldearentzat puntua eta zapiduna eliminatuko da. Ez ahaztu, kanporatua edonor dela ere, bere zenbakia beste taldekide batek hartu behar duela.
TALDE HAUSNARKETA	Jolas hau konpetitiboa izanik, haurren arteko lehiakortasuna nabarmen ikusi genuen. Kaleratuak ziren haur batzuek porrota erraz onartu arren, beste zenbaiti porrota onartze hori zailagoa suertatu zitzaien. Horrez gain, lehenengo kaleratua izan zenak, berriro ere jolasari ekin aurretik denbora asko itxaron behar zuela konturatu ginen. Jokoaren amaieran irabazlea oso pozik jarri zen baina beste ikaskideen artean inbidia sortu zen.

IZENA	ZAPI JOLASA (jolas konpetitiboa)
ITURRIA	http://harriorriar.blogspot.com.es
HELBURUAK	Taldean kooperazioa lantzea, ondo pasatzea, dibertitzea.
ADINA	4 urteko haurrak.
PARTAIDE KOPURUA	16 pertsona inguru
MATERIALA	Zapi bat.
DESKRIBAPENA	Jokalari guztiak bi taldetan banatuko dira, eta agintaria bi taldeen artean kokatuko da zapi batekin. Talde bakoitzeko jokalarien artean zenbakiak banatuko dituzte. Agintariak zenbakiak ozenki banaka esateaz gain, binaka ere esango ditu. Ozenki zenbaki bakarra esatean, zenbaki hori dagokien kideak ahalik eta azkarren joan beharko dira erdikoak eskuan duen zapiaren bila. Kontu handiz eta erdiko marra zapaldu edota pasatu gabe zapia hartzen saiatuko dira. Zapia hartzea lortzen duenak bere kideengana iristea izango du helburu. Zenbakiak binaka esanez ordea, zenbaki horiek dituzten pertsonak eskutik helduta joango dira zapiaren bila. Jolas honetan, aldiz, ez da inor kanporatua izango.
TALDE HAUSNARKETA	Zapi  jolas kooperatiboa, konpetitiboa baina dibertigarriagoa egin zitzaien orokorrean. Inor kaleratua ez izateaz gain, binaka ateratzeak izugarrizko motibazioa eragin zien. Bestalde, inork irabazi ez zuenez, ez zen inor besteen aurrean gailendu, lehiakortasuna ahaztu eta jolas dibertigarri baten modura hartu zuten zapi jolasa.

IZENA	MALETA JOLASA (jolas konpetitiboa)
ITURRIA	http://jolasean.blogspot.com.es
HELBURUAK	Porrota onartzea, gorputza koordinatzea,ondo pasatzea, besteak ez gutxiestea, gorputz adierazpena lantzea eta lotsa galtzea.
ADINA	4-6 urteko haurrak
PARTAIDE KOPURUA	15 pertsona inguru
MATERIALA	Lau maleta eta mozorrotzeko osagarriak
DESKRIBAPENA	Jolasa hasi aurretik haurrak jolas lekuaren alde batean kokatuko dira eta beste aldean maletak kokatuko ditu irakasleak. Ikaskideak lau taldetan banatuko dira. Talde bakoitzak maleta bat edukiko du. Erreleboka maletara joan eta bertako mozorrotzeko osagarri bat hartuko du. Bueltan beste ikaskideari emango dio erreleboa, modu honetan, jardungo dute ikaskide guztiak mozorrotzeko osagarri bat eduki arte. Azkenean, taldekide batek mozorrotzeko osagarri guztiak jantzi beharko ditu eta lehenengo maletara iristen denak irabaziko du.
TALDE HAUSNARKETA	Hasieran oso dibertigarria iruditu zitzaien haurrei. Ez zituzten zailtasunak eduki jolasten ari ziren bitartean, baina jolasaren amaierara iristean, haur batzuek porrota ez zuten onartu eta haserretu egin ziren. Lehiakortasun handia sortu zen taldeen artean, hori dela eta, jolasa ez errepikatzea erabaki zuen irakasleak.

IZENA	MALETA JOLASA (kooperatiboa)
ITURRIA	Ahozko transmisioa.
HELBURUAK	Kooperazioan aritzea, laguntzea,  dibertitzea, taldeekiko harremana estutzea.
ADINA	4-6 urteko haurrak.
PARTAIDE KOPURUA	15 pertsona inguru.
MATERIALA	Lau maleta, mozorro osagarriak eta musika.
DESKRIBAPENA	Jolasa hasi aurretik haurrak jolas lekuaren alde batean kokatuko dira eta beste aldean maletak kokatuko ditu irakasleak. Ikaskideak lau taldetan banatuko dira, talde bakoitzak maleta bat edukiko duelarik. Erreleboka maletara joan eta bertako mozorrotzeko osagarri bat hartuko du. Bueltatzerakoan, beste ikaskideari emango dio erreleboa, modu honetan, jardungo dute ikaskide guztiak bakoitzak mozorrotzeko osagarri bat hartu arte. Azkenean, taldekide guztiek mozorro bana jantzi eta irakasleak jarritako musikarekin dantza egingo dute.
TALDE HAUSNARKETA	Haurrak oso ondo pasatu zuten, denok mozorrotuta dantzan aritu zirelako. Ez zen gatazkarik sortu eta irakasleak jolas honen bitartez, haurren arteko lehia ekidin zuen. Horrez gain, lotsa alde batera utzirik, beraien sentimenduak askatu zituzten eta poza transmititu zuten uneoro.

IZENA	SAGUA ETA KATUA (jolas konpetitiboa)
ITURRIA	Ahozko transmisioa.
HELBURUAK	Porrota onartzea, gorputza koordinatzea,ondo pasatzea, besteak ez gutxiestea eta tonifikazioa indartzea
ADINA	6 urteko haurrak.
PARTAIDE KOPURUA	14 pertsona inguru
MATERIALA	Ez da materialik behar.
DESKRIBAPENA	Gelakide guztion artean bikoteak osatu ondoren, ilara batean bikote guztiak bata bestearen parean bizkarrez ezarriko dira. Ilaran eskumako aldean kokatuta daudenak saguak izango dira eta ezkerrekoak katuak. Ondoren, hezitzaileak ozenki sagua edo katua esango du. Sagua esaten badu, saguaren helburua  ihes egitea izango da eta katuarena sagua ahalik eta azkarren harrapatzea. Katua esaten badu, ordea, alderantziz. Harrapatzaileak harraparia hartzen badu, irabazle bilakatuko da baina harrapariak ihes egiten badu, ordea, galdu egingo du.
TALDE HAUSNARKETA	Zailtasunak eduki zituzten haurrek jolasean. Nahasi egiten ziren sarritan nork harrapatu behar zuen eta zeinek ihes egin. Urduri jarri ziren eta jolasaren helburua ez zuten ulertu, bakoitzak nahi zuena egiten baitzuen.  Gehienek ez zuten porrota onartu eta kanporatuak izatean jolasten jarraitzen zuten haurrei trabak ezarriz. Hala ere, beste batzuek ondo pasa zuten gelakideak errespetatuz.

 

IZENA	SAGUA ETA KATUA (jolas kooperatiboa)
ITURRIA	Ahozko transmisioa.
HELBURUAK	Gorputza koordinatzea, talde barnean kohesioa izatea eta ondo pasatzea.
ADINA	6 urteko haurrak.
PARTAIDE KOPURUA	14 pertsona inguru
MATERIALA	Ez da materialik behar.
DESKRIBAPENA	Haurrek bikoteak osatuko dituzte eta ilaran bata bestearen parean bizkarrez kokatuko dira. Ilaran eskubiko aldean daudenak saguak izango dira eta ezkerraldekoak katuak. Irakasleak ozenki sagua edo katua esango du. Sagua esaten badu, saguak katuaren gainera salto egingo du ahal duen bezala. Katua esaten badu, ordea, alderantziz; katuak saguaren gainera salto egingo du. Jolas honetan ez da inor kanporatuko.
TALDE HAUSNARKETA	Haur gehienak dibertitu egin ziren ez baitzen inor kanporatua izan. Batak besteari salto egitean laguntza eskaintzen zioten eta hori dela eta, bikoteen arteko harremanak sendotu egin ziren. Orokorrean, giro oso ona sortu zen eta hainbatetan errepikatu zen jolasa.

IZENA	PUXIKA NORENTZAT? (jolas konpetitiboa)
ITURRIA	http://egbjolasak.ulibarri.info
HELBURUAK	Porrota onartzea, gorputza koordinatzea, besteak ez gutxiestea eta ondo pasatzea.
ADINA	6 urteko haurrak.
PARTAIDE KOPURUA	14 pertsona inguru
MATERIALA	Puxika.
DESKRIBAPENA	Umeek puxika gorantz botatzen dute. Puxika jotzen duenak erabakiko du hurrena nork jo behar duen, lagun baten izena esanez, adibidez "Gorka". Puxikak lurra ukitu baino lehen Gorkak, beste kolpe bat emanez, lagun baten izena esango du. Puxika lurrera erortzen bada, jo behar zuenak galduko du eta kanpoan geratuko da.
TALDE HAUSNARKETA	Ez zitzaien asko gustatu jolasa. Berez, puxika jotzea egokitu zitzaion ikasleak baino lehenago, beste norbaitek jotzen baitzuen puxika. Beraz, koordinazio falta handia nabaria zen. Haurrak kanporatzean orokorki,  ez zuten porrota onartzen eta gainontzeko haur eta irakaslerekin haserretzen zen.

IZENA	PUXIKA NORENTZAT? (jolas kooperatiboa)
ITURRIA	Ahozko transmisioa.
HELBURUAK	Taldekideen arteko komunikazioa lantzea, laguntzea, gelakideekiko konfiantza izatea, txandak errespetatzea eta dibertitzea.
ADINA	6 urteko haurrak.
PARTAIDE KOPURUA	14 pertsona inguru
MATERIALA	Puxika.
DESKRIBAPENA	Umeek puxika gorantz botatzen dute. Puxika jotzen duenak erabakiko du hurrengoa nork jo behar duen, lagun baten izena esanez, adibidez "Gorka". Puxikak lurra ukitu baino lehen Gorkak, beste kolpe bat emanez, lagun baten izena esango du. Puxika lurrera erortzen bada, berriro prozesu berdinari ekingo dio.
TALDE HAUSNARKETA	Jolas hau kooperatiboa izanik, gusturago sentitu ziren haurrak jolas konpetitiboan baino. Ez zen inor kaleratua izan, eta batak besteari laguntza eskaintzen zion. Denek jo nahi zuten puxika lurrera ez erortzeko eta hainbatetan, batek baino gehiagok jotzen zuten aldi berean. Hala ere, oso ondo pasa zuten elkarren arteko lehiakortasuna alde batera utzirik.

IZENA	AULKI JOLASA (jolas konpetitiboa)
ITURRIA	http://harriorriar.blogspot.com.es
HELBURUAK	Arintasuna lantzea, konpetibitatea lantzea, porrota onartzea.
ADINA	5 eta 6 urte.
PARTAIDE KOPURUA	15 pertsona inguru
MATERIALA	Aulkiak eta musika.
DESKRIBAPENA	Aulkiak borobilean jarriko dira baina jarriko diren aulki kopurua taldeko pertsona kopurua baino bat gutxiago izango da. Irakasleak musika jarriko du eta haurrak musika entzuten ari diren bitartean aulkien inguruan dantzan eta ibiltzen arituko dira. Musika gelditzen denean, haur bakoitza aulki batean eseri beharko da. Ikasle bat eserlekurik gabe geldituko denez, jolasetik kanpo geratu eta eliminatu egingo da. Ondoren, aulki bat kendu eta prozesu bera behin eta berriz errepikatuko da, batek irabazi arte.
TALDE HAUSNARKETA	Jolasean eliminatuak egonik, lehengo kaleratzen zen haurrak, besteen jolasari begira denbora gehiegi igaro zuen. Horrez gain, bi haur aldi berean aulki berberean esertzen zirenean haserretu egiten ziren beraien artean eta guk sartu behar izaten genuen nor eseri zen lehenengo esatera. Kaleratzen genuen haurra ez zen gustura sentitzen eta guretzat ere zaila egiten zen nork galdu zuen esatea. Beraz, jolas honek beraien arteko lehiakortasuna erabat berpiztu zuen.

IZENA	AULKI JOLASA (jolas kooperatiboa)
ITURRIA	http://harriorriar.blogspot.com.es
HELBURUAK	Elkarren arteko kooperazioa sustatzea eta dibertitzea.
ADINA	5 eta 6 urte.
PARTAIDE KOPURUA	15 pertsona inguru.
MATERIALA	Aulkiak eta musika.
DESKRIBAPENA	Aulkiekin borobil bat egingo da eta musika martxan dagoen bitartean, haurrak aulkien inguruan dantzan eta ibiltzen ariko dira. Musika gelditzean, guztiak aulki gainera igo beharko dute. Hankek ezin dute lurra ukitu eta hezitzaileak arau hau ongi bete dutela baieztatzean, aulkien joko arruntean bezala, aulki bat kenduko zaie. Jolas mota honetan, ez da inor kanporatuko. Ondorioz,  aulki berdin batean pertsona bat baino gehiago egon daiteke. Geldiune bakoitzaren ostean aulki bat kenduz eta jolaskideen kopuru bera mantenduz, gero eta aulki gutxiagoren gainera igotzeko estrategiak topatu beharko dituzte.
TALDE HAUSNARKETA	Konpetitiboarekin alderatuz, haurrek askoz hobeto pasa zuten aulki jolas kooperatiboan. Lehiakortasuna ez zegoenez, musikarekin dantza lasaiago egiten zuten eta giro dibertigarriagoa sortu zen. Bestalde, aulki berean pertsona asko egon ahal izateak estrategia eta taktika ezberdinak pentsatzea eragin zien, eta estrategia horiek zenbait ikaskiderekin ondo burutzeko gai izan ziren.